Habs-e-Duniya Se Guzar Jaatay Hain

Habs-e-Duniya Se Guzar Jaatay Hain
Aisa Kartay Hain Ke Mar Jaatay Hain

Kaisay Hotay Hain Bicharnay Waalay ?
Hum Ye Sochain Bhee Tou Dar Jaatay Hain

Dil Jo Tootay Tou Sar-e-Mehfil Bhi
Baal Be-Wajaa Bikhar Jaatay Hain

Ab Na Dekho Meri Banjar Aankhain
Charhtay Darya Tou Utar Jaatay Hain

Dhoop Ka Roop Rachaanay Waalay
Shaam Ko Aur Nikhar Jaatay Hain

Tum Kahaan Jao Ge Socho Mohsin ?
Log Thak Haar Ke Ghar Jaatay Hain

Advertisement