Zakhm ko phul to sar sar ko saba kahate hain

Zakhm ko phul to sar sar ko saba kahate hain
jane kya daur hai kya log hain kya kahate hain
kya qayamat hai ke jin ke liye ruk ruk ke chale
ab wohi log hamen aabalapa kahate hain
koi batalao ke ik umr ka bichada mahbub
ittefaqan kaheen mil jaye to kya kahate hain
ye bhi andaz-e-sukhan hai ke jafa ko teri
gamza-o-ishva-o-andaz-o-ada kahate hain
jab talak dur hai tu teri parastish kar lain
hum jise chu na saken us ko khuda kahate hain
kya ta’ajjub hai ke hum ahl-e-tamanna ko ‘faraz’
wo jo maharum-e-tamanna hain bura kahate hain

Advertisement